නංගී ගොවිගමද..?

නංගී ගොවිගමද..?

නෑ…, අයියේ, මම අටළුගම.

නෑ අනේ..! ඔයාලගේ කුලේ ගැන ඇහුවේ.

කුලේ අපේ කෙනෙක් නෙවෙයි අයියේ, ගෙවල් ළඟ කෙනෙක්. නෑයෙක් නෙවෙයි. අපේ අයිය⁣ගෙ නම්, යාළුවෙක්. මම එයාලා එක්ක කිසිම කතාවක් නෑ අයියේ. ඇයි.., කවුරුත් මොනවත් කිව්වද අපි ගැන..? ඌ මගෙ පස්සෙන් ආවා තමයි. මම කැමති වුණේ නෑ..! සත්තයි..!!

අයියෝ නංගී.., එහෙම නෙවෙයි. අපේ ගෙවල් වලින් කුලේ හොයනවා.

අයියලගෙ ගෙදරින් එන දවසට කියන්න. මම අපේ අයියට කියන්නම්, කුලේ අයියව එදාට අපේ ගෙදරට එක්ක එන්න කියලා.

අනේ මන්දා නංගි ඔයත්. මම කියන්නේ අපි කසාඳ බඳින්න නම්, අපේ කුලවල් දෙක ගැළපෙන්න ඕන කියලා අම්මලා කියන්නෙ.

අපේ ගෙදර තියෙන්නේ, වේවැල් කුල්ලක් අයියේ. අය්යලහ මොකක්ද තියෙන්නේ..? අපිත් එයින් එකක් ගන්නම්. එතකොට හරිනේ..!

අපි ගොවිගම මිනිස්සු නංගී. තේරුම් ගන්න කිව්වහම.

ආ..! අය්යලා ගොවිතැන් කරන අයද..? ඒකට කමක්නෑ අයියේ. මොන රස්සාව කලත්, අයියගෙ මනුස්සකමටනෙ මම කැමති වුණේ. ගමේම අය ගොවිතැන්ද කරන්නේ අයියේ..?

එහෙම එකක් නෙවෙයි නංගී. මිනිස්සුන්ට කුල තියෙනවා. ඒකවත් දන්නේ නැද්ද..?

දන්නවා අයියේ.

එහෙනම් කියනවා බලන්න, ඔයාලගෙ කුල තියෙන්නේ මොනවද කියලා, විකාර නැතුව.

කකුල තියෙනවා, තව උකුල තියෙනවා. අයියේ එච්චරයිනේ ඉතින්. මට එහෙම ආබාධිත තත්ත්වයක් නෑ අයියේ. ආවහම බලන්න මම ඇවිදිනකොට වෙනසක් තියෙනවාද කියලා. එහෙම නෑ අයියේ.

අයියෝ නංගී, එහෙම නෙවෙයි.

එහෙනම් අයියේ..?

ඔයාලගෙ වාසගම මොකද්ද..?

මම කිව්වේ අයියේ, අපි අටළුගම.

අටළුගම ආරච්චිගේද..? අටළුගම අන්තෝනිගේද..? එහෙම නැද්ද…??

නෑ අයියේ, අටළුගම හංදියට ඇවිත්…,

“තැපැල් කන්තෝරුවේ වැඩකරන පියදාසලාගේ ගේ කොහෙද…?”

කියලා අහන්න.

ඕන කෙනෙක් පෙන්නයි, අපේ ගෙදර.

අයියෝ..! නංගිලා බෙර ගහන අයද..? වළං හදන අයද..? රෙදි සෝදන අයද..?

දහම් පාසලේ පෙරහැරේ බෙර ගහලා තියෙනවා අය්යේ, ඒ දවස්වල. අනේ වළං ගේන්නේ ඉතින්, කඩෙන්. ගෙදර හදන්න තේරෙන්නේ නෑ අපට. රෙදිනම් සෝදනවා ඉතින් අයියේ, හැමදාම.

අනේ අයියේ මම බෙර ගගහා සද්ද කරන කෙනෙක් නෙවෙයි. මම කැමති නෑ එහෙම සද්ද බද්ද දාගෙන ගෙදර ඉන්න.

වොෂින් මැෂින් එකක් ඕනෙ නෑ..! මම අයියගෙ රෙදිත් හෝදලා දෙන්නම්කෝ, හැමදාම. ඒවා මට පුරුදු දේවල්. අනවශ්‍ය වියදම් ඕනෙ නෑ අපට.

දැන් ගොඩාක් වෙලා කතා කලානේ. එහෙනම් මම තියන්නම්. පරිස්සමෙන් අයියේ. ගොවිගම කට්ටිය ඔක්කොම ආවත් එදාට කමක් නෑ කියලා අපේ තාත්තා කියන්න කිව්වා..😁😂